Inilathala ni Kristine Grace Vicedo mula sa Taong IV, Silid Bilang VII.
Sabi ng
kantang Ingles ng mang aawit na si Jay Sean, “Party like, like it’s the end of
the world. We’re gonna party like, like it’s 2012!” Ngayon lamang ata may umawit
tungkol sa isang taon at ang mensahe pa ng kanta ay ang magpakasaya nang parang
guguho na ang mundo. Totoo nga kaya ang prediksyon ng mga Mayan na matatapos na
ang mundo sa Disyembre ng taong ito? Kung oo, tayong mga Pilipino ay maraming
mababaong mga alaala sa kabilang buhay dahil sa mga naganap sa taong 2012,
kahit na Nobyembre pa lamang ngayon. Halika at sabay nating balikan ang mga
pinakaimportanteng pangyayaring tumatak sa mga Pilipino sa taong ito.
Sa usapang
Politika sa Pilipinas, Enero pa lamang ay nagsimula na ang paglilitis sa
inaakusahang Chief Justice o Punong Mahistrado ng Kataas-taasang Hukuman ng
Pilipinas na si Renato Corona. Pagdating ng Mayo ay nahatulan si Corona ng
nagka-sala na naging dahilan nito para makulong siya at matanggal sa kanyang
pwesto.
Pagdating ng Agosto ay itinalaga si Maria Lourdes Sereno bilang bagong
Punong Mahistrado. Sa buwan ng Hulyo naman naganap ang taon-taong SONA o sa
Filipino ay Talumpati sa Kalagayan ng Bansa. Ang kasalukuyang presidente ng
Pilipinas na si Benigno Aquino III parin ang naghatid ng mga mensahe ukol sa
kasalukuyang dinaranas ng bansa at ng mga Pilipino. Sa malungkot na balita
naman ay noong Agosto, pumanaw ang DILG Secretary o ang Kalihim ng Interyor at
Pamahalaang Lokal na si Jesse Robredo dahil sa isang aksidente ng eroplano.
Tunay na nanghinayang ang mga Pilipino sa kawalan ng bansa ng isang tapat at
mabuting politiko. Dahil dito, ang bago nang Kalihim na itinalaga ay si Mar
Roxas. Setyembre ay isinabatas ang “Cybercrime Prevention Act” na umani ng
sangkatutak na batikos hindi lamang mula sa mga kabataan ngunit pati sa mga
ibang gumagamit ng internet.
Sa larangan
naman ng sports, noong Mayo ay nanalo ang B-Meg Llamados laban sa Talk ‘N Text
Tropang Texters sa PBA Commissioner’s Cup Finals. Hunyo naman ay nagulat ang
mga Pilipino nang matalo si Manny Pacquiao ni Timothy Bradley at nawala kay
Pacquiao ang kanyang WBO Welterweight Championship belt, ngunit kahit ganito ay
si Pacquiao parin ang panalo sa puso ng bawat Pilipino. People’s Champ nga
talaga, kumbaga. Pagbalik sa larangan ng basketball ay ngayong Oktubre lamang
ay nagwagi nanaman ang Ateneo Blue Eagles sa UAAP championships, laban sa UST
Growling Tigers.
Noong taong
2009 ay naganap ang Ondoy – isa sa mga hindi malilimutang bagyo ng mga taga
Maynila dahil halos ang buong rehiyon at mga karatig lugar nito ay nalubog sa
baha. Tila naulit ito sa dalang ulan at baha ng hanging habagat sa mga taga
Maynila. Ngunit, salamat sa Diyos ay mas kaunti ang mga nasalanta sa habagat
kumpara parin sa bagyong Ondoy.
Sa aspetong
aliwan naman at showbiz, maraming mga banyagang bumisita sa bansa hindi lamang
para mag konsyerto ngunit pati narin mag endorso ng iba’t ibang mga tatak.
Ngunit, ang konsyerto ni Lady Gaga noong Mayo na marahil ang umani ng maraming
reaksyon dahil sa mga nagprotesta na huwag ito payagan na magkonsyerto dahil sa
mga kontra-Kristo umano nitong mga kanta. Subalit kahit maraming mga
Kristyanong nagprotesta nito ay natuloy parin ang konsyertong inabangan at
dinaluhan ng libo libong mga tagahanga ni Lady Gaga. Pero, marahil na ang
pinaka tumatak sa mga puso’t isipan ng bawat Pilipino ngayong taon ukol sa
showbiz, ano mang edad, ay ang pagpanaw ng Hari ng Komedya na si Dolphy noong
Hulyo. Sabay sabay nagluksa ang bansa sa kawalan ng isang napakahusay na actor
at komedyante.
Kamakailan
lamang, ngayong Oktubre ay may naganap rin sa isang Pilipino na nakilala sa
buong mundo na si Pedro Calungsod. Matapos ang sobrang tagal na paghihintay ay
na-kanonisa narin siya bilang santo. Si Blessed Pedro Calungsod ang pangalawang
PIlipinong santo.
Kay rami
nang nagdaan at naganap sa taong ito. Ang iba ay malungkot habang ang iba naman
ay masaya. Ngunit hindi parin tapos ang taong ito. Ang tanong ay andyan parin:
matatapos nga kaya ang mundo nitong paparating na Disyembre? Marahil na oo,
marahil na hindi. Marahil na binabasa mo ito at lampas na ng Disyembre 2012, at
kung gayon nga ang sitwasyon ay salamat sa Diyos na hindi gumuho ang mundo.
Marahil ay binabasa mo ito at ako’y may mga apo na o hindi kaya’y pumanaw na. Guguho
man ang mundo sa susunod na dalawang buwan, ako’y hindi mababahala at magpapakasaya
na lamang tulad ng payo ni Jay Sean sa kanyang kanta. Darating ang oras na
hindi maiiwasan ng kung sino man, at pagdating ng oras na iyon, ako’y masaya
dahil nakabahagi ako ng piyesa ng aking kasalukuyan sa iyong kasaysayan.
Walang komento:
Mag-post ng isang Komento